კონტენტზე გადასვლა

თუშეთი საქართველოს მაღალმთიანი რეგიონია, უიშვიათესი და უნიკალური ბუნებით, ტრადიციაებით, არქიტექტურითა და სულისკვეთებით. თუშეთის უძველესი სოფლები, ქვის სახლები და კოშკები თქვენს მოლოდინებს გადააჭარბებს. ხელუხლებელი, ველური პეიზაჟები, ცაში გამოკიდებული მთები და მინდვრები დაუვიწყარ შთაბეჭდილებას ახდენს მნახველზე.

სოფლები და კურორტები თუშეთში

რა ვნახოთ თუშეთში?

თუშეთი საქართველოს ერთ-ერთი ყველაზე სანახაობრივი მხარეა, გამორჩეული ბუნებით, იშვიათი ფლორითა და ფაუნით, არქიტექტურითა და პეიზაჟებით. აქ ნახავთ ხელუხლებელ ტყეებს, აყვავილებულ მინდვრებსა და ფერდობებს, ულამაზეს ხეობებს, საიდანაც მთის გრილი და სასიამოვნო ნიავი უბერავს.

თუშეთის სოფლებიდან აუცილებლად მოინახულეთ ომალო, დართლო, დოჭუ და დიკლო. ყოველი მათგანი დამახასიათებელია თავისი სილამაზით, ხედებითა და კულტურული მემკვიდრეობის ძეგლებით.

თუშეთის გამორჩეული კურორტია, თორღვას აბანო, სადაც მინერალური წყლის აბაზანების მიღებასთან ერთად, საუცხოო ხედებითაც დატკბებით.

ისტორიული ძეგლებიდან კესელოსა და დიკლოს ციხეებია შემორჩენილი. ასევე ფიქლით ნაგები უძველესი სახლები და სხვა სამეურნეო დანიშნულების ნაგებობები.

კესელოს ციხე

კესელოს ციხე-სოფელი XVIII საუკუნეში აშენდა. კომპლექსი 12 კოშკისგან შედგებოდა. გადმოცემის მიხედვით, შამილისა და ლეკიანობის დროს სოფელი ამ ციხეში იხიზნებოდა და იბრძოდა. ამჟამად შემორჩენილია 6 ციხე-სახლი.

კესელოს ციხე - Keselo fortress.

შენაქოს ეკლესია

შენაქოს ეკლესია XIX საუკუნის ძეგლია. იგი “თავისუფალი ჯვრის” ტიპის ნაგებობაა. ნაშენებია ფიქლითა და კირის დუღაბით. ტაძარი სოფელ შენაქოს განაპირას დგას. კარიბჭის დასავლეთ კედელზე დაშენებული ყოფილა გეგმით კვადრატული სამრეკლო, რომლისგანაც მხოლოდ საფუძველი შემორჩა.

შენაქოს წმინდა გიორგის ეკლესია - Shenako St. George Church.

დართლოს ეკლესია

დართლოს დარბაზული ეკლესია ნაგებია ქვიშაქვით. ეკლესია ძლიერ დაზიანებულია. შემორჩენილია მხოლოდ სამხრეთის, აღმოსავლეთის და დასავლეთ კედლის მნიშვნელოვანი ნაწილი.

დართლოს ეკლესია - Dartlo Church.

თორღვას აბანო

თორღვას აბანო თუშეთის ტერიტორიაზე მდებარე კურორტია. აქაური მინერალური წყლები, ბუნება, ტყეები და მთის ჰავა სამკურნალოდ და დასასვენებლად საუკეთესო კომბინაციაა. აქაური წყლის სამკურნალო თვისებების სპექტრი საკმაოდ მრავალფეროვანია.

თორღვას აბანო - Torghva Bath.

აბანოს უღელტეხილი

აბანოს უღელტეხილი ყველაზე მაღალი სამანქანო გზაა საქართველოში. გზა წლის მხოლოდ ერთ ნახევარშია გახსნილი. მდებარეობიდან გამომდინარე საკმაოდ რთული გასავლელია, თუმცა მოგზაურობისას საოცარ ხედებს, ხეობებსა და დანისლულ მთებს შეხვდებით.

აბანოს უღელტეხილი - Abano Pass.

დიკლოს ციხე-სიმაგრე

დიკლოს ციხე-სახლი გვიანი შუა საუკუნეების ძეგლია. სახლი სამ სართულიანია. ნაშნებია და გადახურულია ფიქლით. კედლის ფასადზე ამოკვეთილია სამი ჯვარი, ხოლო ჩრდილო-აღმოსავლეთ და ჩრდილო-დასავლეთ კედლებში ჩაყოლებულია ორ-ორი თეთრი სამკუთხა ქვა.

დიკლოს ციხე - Diklo fortess.

თუშეთის ეროვნული პარკი

თუშეთის ეროვნული პარკი სხვადასხვა სირთულის 11 ტურისტული მარშრუტს მოიცავს. ვიზიტორებს შეუძლიათ შეარჩიონ მათთვის სასურველი სალაშქრო, ველო, საცხენოსნო, კულტურული, ფრინველებზე და ნიამორებზე დაკვირვების ტურები.

თუშეთის ეროვნული პარკი - Tusheti National Park.

აწუნთას უღელტეხილი

აწუნთის უღელტეხილზე თუშეთიდან ხევსურეთში გადასასვლელი საფეხმავლო გზა გადის. უღელტეხილის მიდამო დაფარულია ალპური მდელოებით. გზად თქვენს თვალწინ იშლება ულამაზესი ხეობები, მთები და ალპური მცენარეული საფარი.

აწუნთის უღელტეხილი - Atsunti pass.

თებულოსმთა

თებულოსმთა აღმოსავლეთ კავკასიონის უმაღლესი წერტილია. ფერდობები დაფარულია მყინვარებით. სიმაღლე 4498 მ. მდებარეობს თუშეთ-ხევსურეთის კავკასიონზე. შევერცხლილი მთის სურათი საოცარი სანახავია ცისფერი ცისა და კლდოვანი მთების კონტრასტულ ფონზე.

თებულოსმთა - Mountain Tebulo.

დიკლოსმთა

დიკლოსმთის ფერდობებზე მყინვარი ეშვება. აქვს რელიეფის მყინვარული და ეროზიულფორმებიანი ციცაბო კალთები. ჩრდილო და სამხრეთ კალთებზე თანამედროვე მყინვარებია. განვითარებულია სუბალპური, ალპური, სუბნივალური და ნივალური ლანდშაფტები.

დიკლოსმთა - Diklosmta.

ხშირად დასმული კითხვები

როგორია თუშეთის გზა?

თუშეთამდე მისასვლელი სამანქანო გზა საკმაოდ რთული გასავლელია. ამისათვის აუცილებლად მაღალი გამავლობის მანქანა და გამოცდილი მძღოლი დაგჭირდებათ. აბანოს უღელტეხილის მონაკვეთი დაახლოებით 72 კილომეტრია და მის გასავლელად საშუალოდ 4 სააათი დაგჭირდებათ.

მაღაზიები თუშეთში

ომალოში რამდენიმე მაღაზიაა, სადაც შეგიძლიათ შეიძინოთ როგორც სურსათი, ისე სუვენირები. თუმცა არჩევანი არც თუ ისე დიდია. ამიტომ უმჯობესია, რომ სასურველი პროდუქტები გზად მოიმარაგოთ. გაითვალისწინეთ, რომ თანხა თან იქონიოთ, რადგან მაღაზიებში ანგარიშსწორება ნაღდი ფულით ხდება.

რა დროა საჭირო თუშეთის სანახავად?

თუშეთის ეროვნული პარკის 11 ტურისტული მარშრუტი სხვადასხვა სირთულის 1, 2, 3, 4 და 6 დღიან ბილიკებს მოიცავს. გაითვალისწინეთ, რომ თბილისიდან თუშეთამდე 7-8 საათიანი გზა გელოდებათ. ამიტომ ერთი სრული დღე მგზავრობისთვის უნდა გათვალოთ.

რამდენად უსაფრთხოა თუშეთი?

თუშეთში მოგზაურობისთვის აუცილებელია შეარჩიოთ წლის სწორი მონაკვეთი, მაშინ, როდესაც მისასვლელი გზა გაწმენდილი და უსაფრთხოა. ასევე გაითვალისწინეთ ამინდი, რათა აბანოს უღელტეხილზე გართულებები თავიდან აიცილოთ.