გუდაური ერთ–ერთი გამორჩეული სამთო–სათხილამურო კურორტია, რომელიც ნებისმიერ ვიზიტორს დაუვიწყარ შთაბეჭდილებებს უტოვებს. კურორტი განსაკუთრებით იზიდავს მათ, ვისაც უყვარს ზამთრის სპორტი, უფრო მეტად კი თხილამურებზე სრიალი. გუდაურის ჰავა სამკურნალო თვისებებით გამოირჩევა, ასე რომ ის, ნებისმიერი ასაკისა და ინტერესის მქონე ადამიანისთვის მიმზიდველი ზამთრის კურორტია.
გუდაური თბილისთან საკმაოდ ახლოს მდებარეობს, რაც კურორტის ერთ–ერთ მთავარ უპირატესობას წარმოადგენს. თბილისიდან მანძილი 120 კმ–ია და გზაში დაახლოებით საათნახევარი დაგჭირდებათ.
ყოველდღიურად, თბილისის ავტოსადგურიდან გუდაურის მიმართულებით, აქტიურად ინიშნება მიკროავტობუსებიც. ტრანსპორტის სხვა ალტერნატივად შეგიძლიათ ტაქსიც განიხილოთ.
გუდაური მცხეთა–მთიანეთში, კავკასიონის სამხრეთ ფერდობზე მდებარეობს. ზღვის დონიდან 2196 მეტრზე მდებარე დასახლება, 1887 წლიდან კურორტის სტატუსის მქონეა, რაც გუდაურის კლიმატმა და ზამთრის სპორტისთვის ხელსაყრელმა რელიეფმა განაპირობა. გუდაური ზამთრის კურორტია და შესაბამისად, ტურისტების დიდი ნაწილიც კურორტს თოვლიან სეზონზე სტუმრობს.
მზარდი მოთხოვნიდან გამომდინარე, გუდაური სრულიად უზრუნველყოფილია ზამთრის სეზონისთვის საჭირო ინფრასტრუქტურით. დამსვენებლებს შეუძლიათ ისრიალონ თხილამურებით, იმგზავრონ საბაგირო გზით, ან ისიამოვნონ გასაოცარი გადასახედი პლატფორმებით. გუდაური არა მარტო მოყვარულ, არამედ პროფესიონალ მოთხილამურეებსაც ხშირად მასპინძლობს. აქ ტარდება სხვადასხვა რეგიონული, თუ მასშტაბური შეჯიბრებები, დამატებითი ღონისძიებები და გასართობი აქტივობები.
შესაბამისად, თუ ზამთარი და თოვლი გიყვართ, არ აქვს მნიშვნელობა გიზიდავთ ექსტრემალური თუ პასიური დასვენება, ნებისმიერი ინტერესის შემთხვევაში, გუდაური ერთ–ერთი საუკეთესო კურორტია დასასვენებლად.
მიუხედავად იმისა, რომ გუდაურში დასვენება კლიმატის თვისებებიდან გამომდინარე, ზაფხულობითაც სასარგებლოა, საუკეთესო პერიოდი კურორტზე დასასვენებლად ზამთრის სეზონია.
დეკემბერი–თებერვლის პერიოდში, გუდაური თოვლითაა დაფარული და კლიმატოთერაპიასთან ერთად, შეგიძლიათ ზამთრის სპორტული აქტივობებითაც ისიამოვნოთ. ამასთან, ზამთარში გუდაურს გაცილებით მეტი ადამიანი სტუმრობს და ამავე პერიოდშივე ბევრი დამატებითი გასართობი ღონისძიება და აქტივობა იმართება, რაც თქვენს დასვენებას, კიდევ უფრო დაუვიწყარს გახდის.
გუდაურის ღირსშესანიშნაობები
რა ვნახოთ გუდაურში?
გუდაური არა მარტო ზამთრის კურორტი, არამედ შესანიშნავი ადგილია, რომელიც გასაოცარ ბუნების ძეგლებს აერთიანებს. გუდაურის მთავარი სავიზიტო ბარათი უნიკალური ხედებია. რელიეფის გამო, გუდაურში რამდენიმე გადასახედი პლატფორმა და კეთილმოწყობილი ზონებია, საიდანაც გასაოცარი ხედებით სიამოვნება შეგიძლიათ. მათგან გამორჩეულია გეორგიევსკის ტრაქტატის მონუმენტი. ტურისტები ასევე ხშირად სტუმრობენ ჯვრის უღელტეხილს და ხადას ხეობას, რომლებიც უნიკალური რელიეფით გამოირჩევიან.
თუ გუდაურს თბილ სეზონებზე ეწვევით, შეგიძლიათ გაეცნოთ უალამაზეს ალპურ ფლორას და სხვადასხვა კლოდვან ბუნების ძეგლებს, რომლებიც ლაშქრობის მოყვარულთათვის იდეალური არჩევანია.
გუდაურის პანორამა
გუდაურის პანორამა ტურისტების ერთ–ერთი საყვარელი ადგილია, რომელიც არა მარტო ხედებით, არამედ უნიკალური არქიტექტურითაც გამოირჩევა. ეს არის წრიული ფორმის მქონე გადასახედი პლატფორმა, რომელსაც ირგვლივ ქვის გალავანი ამშვენებს. გალავნის კედელი ფერად მოზაიკას წარმოადგენს, სადაც საქართველოს ისტორიის ერთ–ერთი პერიოდი – გეორგიევსკის ტრაქტატის ისტორიაა გადმოცემული. ეს მონუმენტი 1983 წელს აშენდა და რამდენიმე თაღისაგან შედგება, საიდანაც გასაოცარი პანორამული ხედი იშლება.
ჯვრის უღელტეხილი
მცხეთა–მთიანეთში მდებარე ამ უღელტეხილს ხევისყრელსაც უწოდებენ. მისი სიმაღლე 2379 მეტრია და გამოირჩევა გასაოცარი სუბალპური რელიეფით. ჯვრის უღელტეხილი ხევის კავკასიონის მთავარი ქედის არეალს, ბიდარისა და მთიულეთის არაგვის წყალგამყოფებს მოიცავს. ჯვრის უღელტეხილზე ასევე გადის საქართველოს სამხედრო გზა. უღელტეხილი შემადგენლობითაც გამოირჩევა და ის ვულკანური ქანებისგანაა წარმოქმნილი. მასთან არსებული მდინარის ხეობა კი ლავური ნაკადის წარმონაქმნია.
ხადას ხეობა
ხადას ხეობა საქართველოს ერთ–ერთი გამორჩეული ბუნების ძეგლია, რომელიც მდინარე მთიულეთის სათავესთან მდებარეობს. ხეობა მოიცავს როგორც დუშეთის, ასევე ყაზბეგის მუნიციპალიტეტებს. ხადას ხეობა განსაკუთრებით მიმზიდველია ლაშქრობის მოყვარულთათვის. აქ შეხვდებით სუბალპური ზონისთვის დამახასიათებელ მცენარეებს და უძველეს დასახლებებს.
