გომისმთა მაღალმთიანი კურორტია, რომლის განსაკუთრებული თვისება უნიკალურ კლიმატსა და ზღაპრულ ხედებშია. მას ნისლების სამეფოსაც უწოდებენ და ის ყველა ვიზიტორში დაუვიწყარ მოგონებებს ქმნის. მყუდრო კურორტი, მთა-გორიანი რელიეფი, ხის ძველებური კოტეჯები და სოჭის ტყეები საინტერესო თავგადასავალს ქმნის ნებისმიერი ასაკის სტუმრისთვის.
თბილისიდან გომისმთამდე მანძილი, 340 კმ-ია, ხოლო ოზურგეთიდან 33 კმ. შესაბამისად, გომისმთის მოსანახულებლად უნდა ეწვიოთ ოზურგეთს, შემდეგ კი დაახლოებით ერთ საათიან სამანქანო გზას გაივლით. თბილისიდან ოზურგეთის მიმართულებით ყოველდღიურად ინიშნება მატარებელი, რომლის მარშრუტი 7 საათს შეადგენს და ასევე მიკროავტობუსები, სადაც გურიაში მოსახვედრად 5 საათი დაგჭირდებათ. ოზურგეთიდან გომისმთის მიმართულებითშეგიძლიათ სპეციალურად დანიშნული მიკროავტობუსებით ისარგებლოთ. მგზავრობისთვის მაქსიმუმ 1 საათია საჭირო. ინდივიდუალური მგზავრობისას კი გაითვალისწინეთ, რომ უპრობლემოდ გადაადგილებისთვის, მაღალი გამავლობის მანქანაა საჭირო.
გომისმთა გურიაში, მესხეთის ქედზე მდებარეობს, ზღვის დონიდან 2755 მეტრზე. ის ასევე მოიცავს მდინარე ბჟუჟის ხეობას. ბახმაროს მსგავსად, გომისმთის კურორტი, გამოირჩევა შერეული კლიმატით, რომელიც სამკურნალო თვისებების მქონეა. აქ ერთიანდება ზღვისა და მთის ჰავა, რომელიც დადებითად მოქმედებს ნებისმიერი ასაკის მქონე ადამიანის ჯანმრთელობაზე. შესაბამისად, გომისმთას, ბახმაროს კურორტის მსგავსად, სამკურნალო დანიშნულება აქვს.
გომისმთის ირგვლივ ვრცელი წიწვოვანი ტყე და ალპური მდელოებია, რომლებიც კლიმატს სამკუნალო თვისებებს სძენს. თავიდან გომისმთა მწყემსებისთვის პოპულარული ადგილი იყო და მას საძოვრებისთვის იყენებდნენ, თუმცა დღეს გომისმთით აქტიურად არიან დაინტერესებულნი ქართველი თუ უცხოელი ტურისტები, რომლებთაც ექსტრემალური ტურიზმი და ლაშქრობა იზიდავთ. მთის რელიეფთან ერთად, აქვე შეხვდებით ჭანჭაოს ტბას, რომელიც გასაოცარი სილამაზით გამოირჩევა.
საუკეთესოა გომისმთა მოინახულოთ ზაფხულში. ამ დროს გომისმთა ბევრად ხმაურიანი და აქტიურია. ამ დროს ამინდებიც საუკეთესოა და ასევე შეგიძლიათ ადგილობრივ დღესასწაულს, გომისმთობას დაესწროთ.
გომისმთა ტურისტებისთვის ახალი აღმოჩენაა და მისი საჭირო ინფრასტრუქტურით მოწყობა ჯერ არ დაწყებულა. კურორტი ზაფხულში გრილი და მშრალია, ხოლო ზამთარში დიდთოვლობით გამოირჩევა. ასევე საკმაოდ ტენიანია და ხშირია წვიმა. რაც შეეხება ნისლიან ამინდს, ეს გომისმთის ერთ-ერთი სავიზიტო ბარათია.
გომისმთა არ არის უზრუნველყოფილი ელექტრონერგიის, წყლისა თუ გაზის სისტემით. ასევე დაზიანებულია მისასვლელი გზა. შესაბამისად, ტურისტები გომისმთას ზაფხულის პერიოდში სტუმრობენ. მიუხედავად იმისა, რომ კურორტი იდეალურია ზამთრისთვის, რესურსების არარსებობის გამო, გომისმთის მოსანახულებლად მთავარი სეზონური პერიოდი მაისი-სექტემბრის პერიოდია.
გომისმთის ღირსშესანიშნაობები
-
ჭინჭაოს ტბა
გომისმთასთან ახლოს, 11 კმ-ში მდებარეობს ულამაზესი ჭინჭაოს ტბა. მცირე ზომის ტბა მთებს შორისაა მოქცეული და კრატერული წარმოშობისაა.
-
გომისმთობის დღესასწაული
გომისმთობის დღესასწაულს აგვისტოში იმართება. თარიღი ცვალებადია და ღონისძიების მანძილზე იმართება სხვადასხვა სპორტული შეჯიბრი და დოღი.
ჩვენი რჩევა
უშუალოდ კურორტზე რესტორნები და კვების ობიექტები არაა განლაგებული. შესაბამისად, კვება ინდივიდუალურად უნდა უზრუნველყოთ. გაითვალისწინეთ, რომ აქ, სასურსათო მაღაზიები არაა ხელმისაწვდომი. უახლოესი რესტორანი სოფელ გომში, გომისმთისკენ მიმავალ გზაზე მდებარეობს. რესტორანი “გომი ვერდანდაში” შეგიძლიათ მდინარის გასაოცარი ხედებით და ქართული ტრადიციული კულინარიით ისიამოვნოთ. კურორტზე ჯერ არაა ხელმისაწვდომი სასტუმროები, მაღაზიები, აფთიაქები და გასართობი ობიექტები.
გომისმთის ისტორია
ისტორიულად გომისმთის ტერიტორია საძოვრებად გამოიყენებოდა, აჭარასა და გურიაში მცხოვრები მწყემსებისთვის. მას მოსახერხებელი რელიეფი და მდებარეობა ჰქონდა. საძოვრები შემოქმედის მონასტრის კუთვნილებაში შედიოდა. ჩანაწერებში გომისმთა 1902 წელს ჩნდება და დახასიათებულია, როგორც მეჩხერად დასახლებული დაბა, 20-მდე ხის სახლითა და დუქნით. დამსვენებლთა რაოდენობა კი დაახლოებით 200 იყო.
1931 წელს კი ქართველი რევოლუციონერი, ფილიპე მახარაძე სტუმრობს გომისმთას. მახარაძეს თან ახლდა დელეგაცია და კლიმატის შემსწავლელი ექსპერტი, რომელმაც შეისწავლა გომისმთის კლიმატური თვისებები. სწორედ შედეგების მიხედვით გადაწყდა ადგილზე კურორტის მოწყობა, თუმცა პროცესი მეორე მსოფლიო ომმა შეაჩერა.
ომის შემდეგ, 1955 წელს, ოზურგეთიდან დაიწყო გომისმთამდე მიმავალი გზის მშენებლობა და აშენდა 500-მდე კოტეჯი. 1970-1980-იან წლებში კი გომისმთა ტურისტებისთვის საყვარელ ადგილად იქცა, რომელსაც ზაფხულის სეზონზე ასობით ადამიანი სტუმრობდა. მზარდი მოთხოვნის გამო, 1991 წელს ელექტროენერგიის გაყვანა დაიგეგმა, თუმცა რიგი მიზეზების გამო, ვერ მოხერხდა. 2010 წელს ტურისტების წახალისების მიზნით, დაწესდა დღესასწაული გომისმთობა. 2020 წელს კი გომისმთას დაბის სტატუსიც მიენიჭა.
ხშირად დასმული კითხვები
რა განსხვავებაა გომისმთასა და ბახმაროს შორის?
გომისმთა, ისევე როგორც ბახმარო სამკურნალო თვისებებით გამორჩეული მთა-გორიანი კურორტია, გურიაში. გეოგრაფიულად ისინი ერთმანეთთან ახლოს მდებარეობენ. შესაბამისად, გომისმთიდან მარტივად შეგიძლიათ ბახმაროს მონახულებაც. მთავარი განსხვავება დასახლების სიმჭიდროვეშია. გომისმთის ინფრასტრუქტურა ნაკლებადაა მოწყობილი და დასახლებაც ნაკლებია. შესაბამისად, გომისმთა მეტად უფრო პოპულარულია ლაშქრობის მოყვარული ტურისტებისთვის.
