აღმოაჩინეთ ლაგოდეხი

ლაგოდეხის 4 საუკეთესო სალაშქრო ბილიკი

ლაგოდეხის დაცული ტერიტორიების ადმინისტრაცია ვიზიტორებს სთავაზობს საერთაშორისო სტანდარტების შესაბამისად მარკირებულ ბილიკებს როჭოს ჩანჩქერის, ნინოსხევის ჩანჩქერის, მაჭის ციხისა და შავი კლდეების ტბის მიმართულებით.

• სიგრძე: 8 კმ

• დრო: 3-4 სთ

• სეზონი: გაზაფხული, ზაფხული, შემოდგომა

• სირთულე: საშუალო

• უდაბლესი წერტილი ზღვის დონიდან: 590 მ

• უმაღლესი წერტილი ზღვის დონიდან: 890 მ

ნინოსხევის ჩანჩქერისკენ საცალფეხო გზა გურგენიანის საინფორმაციო ცენტრიდან იწყება, მიუყვება მდინარე ნინოს ხევის ნაპირებს და საბოლოოდ 40 მეტრიანი ჩანჩქერის პეიზაჟით სრულდება. ჩანჩქერი პატარ-პატარა წყალვარდნილებსა და აუზებს ქმნის კლდის ფერდობზე. ზაფხულობით ჩანჩქერში გაგრილება და მის პირას პიკნიკის მოწყობაც შეგიძლიათ.

• სიგრძე: 10 კმ

• დრო: 4 სთ

• სეზონი: ზამთარი, გაზაფხული, ზაფხული, შემოდგომა

• სირთულე: საშუალო

• უდაბლესი წერტილი ზღვის დონიდან: 430 მ

• უმაღლესი წერტილი ზღვის დონიდან: 740.5 მ

ტური იწყება სოფ. მაწიმში არსებული საინფორმაციო ცენტრიდან და მიემართება მდინარე ბნელიხეობის მიმართულებით

ვიწრო ბილიკს ტყისა და კორომების გავლით მივყავართ საუკუნეების წინ აგებულ ციხე-სიმაგრესთან.

ციხე-სიმაგრის გალავნის შიგნით ჯერ კიდევ დგას კარის ეკლესია და შემორჩენილია მიწისქვეშა გასასვლელები.

გაითვალისწინეთ: თან იქონიოთ პირადობის დამადასტურებელი მოწმობა, რადგან ბილიკი საქართველო-აზერბაიჯანის საზღვრის უშუალო სიახლოვეს მიემართება.

როჭოს ჩანჩქერი

• სიგრძე: 9 კმ

• დრო: 3 სთ

• სეზონი: ზამთარი, გაზაფხული, ზაფხული, შემოდგომა

• სირთულე: საშუალო

• უდაბლესი წერტილი ზღვის დონიდან: 567.8 მ

• უმაღლესი წერტილი ზღვის დონიდან: 922.5 მ

როჭოს ჩანჩქერის სალაშქრო ბილიკი ვიზიტორთა ცენტრიდან იწყება და ფართოფოთლოვანი ტყის გავლით მდინარე შრომიხევის მიმართულებით გრძელდება. ვიწრო, დაკლაკნილი საცალფეხო ბილიკი მდინარის პირს მიუყვება პატარ-პატარა წყალვარდნილებით და უზარმაზარი ლოდებით. მარშრუტის ბოლოს მწვანე კლდეებს შორის მოწყვეტით გადმოვარდნილ როჭოს ჩანჩქერს მიადგებით, რომელიც 6 მეტრის სიმაღლიდან ეშვება.

შავი კლდეების ტბა

• სიგრძე: 42 კმ

• დრო: 3 დღე

• სეზონი: გაზაფხული, ზაფხული, შემოდგომა

• სირთულე: რთული

• უდაბლესი წერტილი ზღვის დონიდან: 569 მ

• უმაღლესი წერტილი ზღვის დონიდან: 2857 მ

შავი კლდეების ტბისკენ მიმავალი მარშრუტის პირველი მონაკვეთი 12 კმ სიგრძისა და 8 საათის ხანგრძლივობისაა. გზა ადმინისტრაციული ცენტრიდან ტურისტულ თავშესაფარ მეტეომდე გრძელდება. მეტეოს მიმდებარე ტერიტორიაზე განლაგებულია სპეციალურად მოწყობილი საპიკნიკე და საკემპინგე ადგილები.

ლაშქრობის მეორე ნაწილი 15 კმ-ის სიგრძისა და 7 საათის ხანგრძლივობისაა. ტურისტული თავშესაფრიდან ტბის მიმართულებით და ღამისთევა ტურისტულ თავშესაფარში – ,,დემიდოვის ბინა“.ბინა განთავსებულია 2650 მეტრზე ზღვის დონიდან ალპურ მდელოზე. ბინიდან ახლოს გადასახედებია მდ. ლაგოდეხისხევის, მდ. შრომისხევის ხეობებზე, ასევე აქედან იშლება საუკეთესო ხედი ალაზნის ველზე და კავკასიონზე.

ტურისტული თავშესაფრიდან ადმინისტრაციულ ცენტრში დასაბრუნებლად 15კმ-ის გავლა მოგიწევთ კუდიგორის ქედის გავლით.

რა ვნახოთ ლაგოდეხში?

ლაგოდეხის ტურისტულ პოტენციალს მნიშვნელოვანწილად მისი ბუნებრივი ღირსშესანიშნაობები განაპირობებს. განსაკუთრებულ ინტერესს იწვევს ლაგოდეხის დაცული ტერიტორიები, მოწესრიგებული, მარკირებული ბილიკებითა და სალაშქრო მარშრუტებით, რომლებსაც ხმაურიან ჩანჩქერებამდე (ნინოსხევის და როჭოს), ალპურ ტბებამდე (შავი კლდის ტბა) და რძისფერ ნისლში გახვეულ მთებამდე (კუდიგორის) და ხეობებამდე მივყავართ.

ბუნების გასაოცარი ხედების გარდა ლაგოდეხის დაცული ტერიტორიების უიშვიათეს ბინადრებსაც შეიძლება გადააწყდეთ. აქ ბინადრობს ჯიხვი, დათვი, ირემი და სხვა იშვიათი და ენდემური სახეობები.

თუკი ქალაქის ისტორიული წარსულის გაცოცხლება გსურთ, მოინახულეთ მაჭის ციხე და ქოჩალოს ბაზილიკის ნანგრევები.

თუკი ლაშქრობების შემდეგ კომფორტული დასავენებელი გინდათ, ლაგოდეხის ეკო სოფელი და კოტეჯები იდეალური ადგილია. აქ ბუნებასთან სიახლოვესა და კომფორტს ერთდროულად იგრძნობთ.

ლაგოდეხის ეროვნული პარკი

ლაგოდეხის ეროვნულ პარკს ჩანჩქერების, უიშვიათესი ფლორისა და ფაუნის სანახავად უნდა ესტუმროთ. აქედან საუცხოო ხედები იშლება კახეთის მინდვრებზე, მდინარეების ხეობებზე და დანისლულ მთებზე. პარკის ტერიტორიაზე შეიძლება გადააწყდეთ კავკასიური როჭოსა და შურთხს, ჯიხვს, ირემს, დათვს, ფოცხვერს და სხვა.

მდინარე ლაგოდეხისხევის სანაპირო ზაფხულობით ადგილობრივების საყვარელი თავშეყრის ადგილია. მდინარის წყალი ცხელი დღეების გაგრილების საუკეთესო საშუალებაა. ხშირად ეწყობა პიკნიკები. მდინარის პირას არსებულ პარკში განტვირთვა და დასვენება შეგიძლიათ.

ქოჩალოს ბაზილიკა ლაგოდეხის ჩრდილოეთით, მდინარე ნინოსხევის მარცხენა ნაპირზე, მთის ფერდზე მდებარეობს. ეკლესია VI-VII საუკუნეებით თარიღდება. 2019 წელს ბაზილიკის გაწმენდითი სამუშაოების დროს უმნიშვნელოვანესი ქართული წარწერა აღმოაჩინეს. ასომთავრული ტექსტი X საუკუნის ბოლოსაა შესრულებული და ეკლესიისათვის მიწების შეწირვის შესახებ მოგვითხრობს.