თელავის ისტორიული მუზეუმი

საქართველოს ერთადერთი შემორჩენილი სამეფო სასახლე, რომელიც დღეს მუზეუმად არის ქცეული, თელავში, ბატონის ციხის ტერიტორიაზე მდებარეობს. ეს ადგილი განსაკუთრებულია - აქ დაიბადა და გარდაიცვალა საქართველოს ერთ-ერთი ყველაზე სახელოვანი მეფე, ერეკლე მეორე.

მუზეუმის ისტორია

მუზეუმი 1927 წელს დაარსდა. თავდაპირველად მხარეთმცოდნეობის მუზეუმად ჩამოყალიბდა, მოგვიანებით კი ისტორიულ-ეთნოგრაფიულ მუზეუმად გადაკეთდა. დღეს მუზეუმი მოიცავს მთელ სამეფო კომპლექსს, რომელსაც "ბატონის ციხე" ეწოდება.

რას ნახავთ მუზეუმში

მუზეუმის კოლექცია 114 000-ზე მეტ ექსპონატს ითვლის. აქ დაცულია უნიკალური ნივთები: მეფე ერეკლეს პირადი ნივთები, ვერცხლის ხანჯალი და სამეფო სამოსი. განსაკუთრებით საინტერესოა სამეფო სტამბაში დაბეჭდილი წიგნები და იშვიათი ხელნაწერები.

სამუზეუმო კომპლექსში შედის:

• XVII-XVIII საუკუნეების კახთა მეფეთა სასახლე

• მეფის კარის ეკლესიები (X-XVIII სს.)

• ერეკლე მეორის მიერ დაარსებული ფილოსოფიურ-საღვთისმეტყველო სკოლის ნაშთები

• XVII საუკუნის მეფის აბანო

• XVIII საუკუნის მიწისქვეშა გვირაბი

• უნიკალური აღმოსავლური და დასავლური კარიბჭეები

სამხატვრო კოლექცია

მუზეუმში წარმოდგენილია მნიშვნელოვანი სახვითი ხელოვნების ნიმუშები. აქ შეგიძლიათ იხილოთ ქართველი და უცხოელი მხატვრების ნამუშევრები, მათ შორის ელენე ახვლედიანის, ლადო გუდიაშვილის, აივაზოვსკისა და სხვა ცნობილი მხატვრების ტილოები.

პრაქტიკული ინფორმაცია

მისამართი: ქ. თელავი, ერეკლე II-ის მოედანი 1

სამუშაო საათები: ყოველდღე, ორშაბათის გარდა, 10:00-დან 18:00 საათამდე

ბილეთის ფასი:

• მოზრდილი - 5 ლარი

• სტუდენტი/მოსწავლე/პენსიონერი - 1 ლარი

• გიდის მომსახურება - 18 ლარი (ხელმისაწვდომია ქართულ, ინგლისურ, გერმანულ და რუსულ ენებზე)

უფასო შესვლა:

• 6 წლამდე ბავშვები

• მუზეუმის თანამშრომლები

• შშმ პირები

• იძულებით გადაადგილებული პირები