აღმოაჩინეთ ონი

რა ვნახოთ ონში?

ონი საინტერესო ტურისტული დანიშნულებაა არა მარტო აქტიური, არამედ პასიური დასვენების მოყვარულთათვის. თუ გიყვართ ლაშქრობა და თავგადასავლები, ონის სუბალპური ბუნება და მთა–გორიანი რელიეფი, დაუვიწყარ თავგადასავალს შეგიქმნით. თუ გსურთ გაეცნოთ საქართველოს შუა საუკუნეების ისტორიას, ონის მრავალფეროვანი კულტურული ძეგლები, გასაოცარ შთაბეჭდილებებს დაგიტოვებთ.

მიუხედავად იმისა, რომ ონი ფართობით მცირეა, აქ მოსანახულებელი საკმაოდ ბევრია. ვიზიტორებისთვის განსაკუთრებულად საინტერესო და პოპულარულია ისეთი ბუნების ძეგლები, როგორიცაა უძირო და სასვანოს ტბები. მნახველებში ასევე გაოცებას იწვევს ონის სინაგოგის უნიკალური არქიტექტურა, რომელიც ასევე ხაზს უსვამს ონის მულტი–კულტურული გარემოსადმი ისტორიულ მიმღებლობასა და პატივისცემას.

კულტურული ძეგლებიდან, ასევე პოპულარულია მრავალძალის ეკლესია და ონის მუზეუმი, რომელიც იდეალური ადგილია, იმისთვის, რომ უკეთ გაიგოთ ონის და სრულიად რაჭის უძველესი ისტორია.

ონის სინაგოგა მე–19 საუკუნის ულამაზესი კულტურული ძეგლია, რომელიც საქართველოში მდებარე ერთ–ერთი უდიდესი სინაგოგაა, ორიგინალური ფასადით, თეთრი კირქვის ჩუქურთმებითა და მრავალქიმიანი დავითის ვარსკვლავიანი გუმბათით. სინაგოგა ეროვნული მნიშვნელობის კულტურის ძეგლთა სიაშია შეტანილი.

უძირო ტბა კატიწვერას დასავლეთ ფერდობზე მდებარეობს და ყოველწლიურად უამრავ მოგზაურს იზიდავს. ულამაზესი პატარა ტბა, მთებს შორისაა მოქცეული და გამოირჩევა სარკისებული ეფექტითა და გასაოცარი ხედებით. ტბასთან ახლოს ტურისტები ხშირად ბანაკდებიან.

სასვანოს ტბები ონში, რიონის ხეობაში მდებარე გასაოცარი ბუნების ძეგლია, რომელიც იდეალურად აერთიანებს ფერადი ყვავილებით დაფარულ მდელოებსა და თოვლიან მყინბარებს. სარკისებული ეფექტი კი ტბებს კიდევ უფრო გასაოცარ სილამაზეს სძენს.

მიუხედავად იმისა, რომ მყინვარი ბუბა რთული ხეობის ტიპის მყინვარს წარმოადგენს, ის მოლაშქრეებისთვის საკმაოდ მიმზიდველი მარშრუტია. გასაოცარი სილამაზის მქონე მყინვარი მდინარე ბუბისწყალს ასაზრდოებს.

ჭიორა და გლოლა ონის მუნიციპალიტეტის გამორჩეული სოფლებია. მთა–გორიანი და ფერადი ფოთლოვანი ტყით დაფარული სოფლები მოლაშქრეების ერთ–ერთი საყვარელი მარშრუტია, რომელსაც უმეტესწილად, ტყის სიფერადის გამო, შემოდგომობით სტუმრობენ.

ლაშქრობის მოყვარულებისთვის სოფელი შქმერი მორიგი თავგადასავალია. ონის მუნიციპალიტეტში მდებარე სოფელი გამოირჩევა სუბალპური მცენარეული საფარით და კლდოვანი ხეობის კანიონით, რომელშიც მდინარე ხეორი მიედინება.

ონის მხარეთმცოდნეობის მუზეუმი იდეალური ადგილია იმისთვის, რომ ონის უძველეს კულტურას გაეცნოთ. აქ ნახავთ გვიანფეოდალური ხანის არქეოლოგიურ აღმოჩენებს, მათ შორის სამკაულებს, საბრძოლო იარაღებსა და სხვადასხვა ეთნოგრაფიულ მასალებს. მუზეუმში დაცულია 15,500–მდე ექსპონანტი.

მრავალძალის ეკლესია ქართული ხუროთმოძღვრების ერთ–ერთი გამორჩეული ძეგლია, რომელიც მე–11 საუკუნეში ააგეს. ეკლესია ულამაზესი ჩუქურთმებითა და ფრესკებით გამოირჩევა. აღსანიშნავია, რომ 1934 წლამდე, ეკლესიაში შაჰ–აბასის ხმალი და ჯალალ–ედ–დინის მუზარადი ინახებოდა. ტურისტებში მრავალძალის ეკლესიის პოპულარობა კი უფრო მეტად, უნიკალური ხედებითაა განპირობებული. ეკლესიიდან ულამაზესი მთის ხედები იშლება, სვანეთისა და რაჭის მთებზე.