აღმოაჩინეთ ბორჯომი

რა ვნახოთ ბორჯომში?

ბორჯომის არქიტექტურა და კულტურული მემკვიდრეობის ძეგლები მეტად მრავალფეროვანია. ქალაქში ვხვდებით XIX-XX საუკუნის შენობებს, ქვის ფასადებსა და ხის აივნებს, აღმოსავლური ინტერიერისთვის დამახასიათებელ ნიშნებსა და ნეორენესანსის სტილში გადაწყვეტილ სასახლეებს.

ბორჯომის ულამაზეს ხეობაში ქალაქის ისტორიულ ციხეებსა და ქრისტიანულ ტაძრებს მოინახულებთ, გაუყვებით სალაშქრო ბილიკებს და ხეობის თვალუწვდენელი ხედებით დატკბებით.

გოგირდის აუზამდე, ბორჯომის პარკის გავლით, მდ. ბორომულას გასწვრივ, ბილიკი მიგიყვანთ. აუზის საშუალო ტემპერატურა 32-38° გრადუსია.გოგირდის აუზს სტუმრობენ როგორც მკურნალობის მიზნით, ასევე დასასვენებლად. აქვეა გასახდელები და საშხაპეები. სტუმრებისთვის ტერიტორია კეთილმოწყობილია.

პეტრეს ციხე ბორჯომში, ლიკანის მოპირდაპირე მხარეს, კლდოვან ფერდობზე მდებარეობს. ნაგებობა შუა საუკუნეებით თარიღდება. შემორჩენილია სხვადასხვა საყოფაცხოვრებო და საბრძოლო დანიშნულების ნაშთები - ხაროებისა და მარნის ნაშთი, გალავანში დატანებულია სათოფურები და სალოდეები.

ბორჯომის მუზეუმი განათავსებულია რუსეთის საიმპერატორო ოჯახის, რომანოვების, კანცელარიის შენობაში. მუზეუმში დაცულია არქეოლოგიური მასალა, მზის ღვთაებასთან დაკავშირებული დისკოები, ბრინჯაოს ბალთები, და სხვ.; რომანოვების საიმპერატორო ოჯახის პირადი ნივთები - გამოყენებითი და სახვითი ხელოვნების ნიმუშები.

მწვანე მონასტერი ბორჯომის მუნიციპალიტეტის სოფელ ჩითახევში მდებარეობს. მონასტრამდე ტყით დაფარულ გზასა და კამკამა მთის მდინარის სანაპიროს მიუყვებით. მონასტრამდე მიდის სამანქანო გზაც.

რომანოვების სასახლე მეცხრამეტე საუკუნეში, ლიკანში ააგეს. სასახლეში დაცულია ნაპოლეონის ნაჩუქარი მაგიდა, ირანის შაჰის ნაჩუქარი სავარძელი და სხვა ანტიკვარული ნივთები. მოწყობილია ბილიარდისა და ე.წ. პეპლების ოთახი, რომანოვის კაბინეტი და სხვა.

პრომეთეს ძეგლი ბორჯომის პარკში, კლდოვანი ფერდობის ძირში მდებარეობს, საიდანაც ქანდაკების ორივე მხარეს ჩანჩქერი ჩამოედინება. ჩანჩქერებთან მოწყობილია სკამები, სადაც შეგიძლიათ შეჩერდეთ, დაისვენოთ და ფოტოები გადაიღოთ.

ბორჯომის პლატოზე, ტყეში წმინდა სერაფიმე საროველის სახელობის ტაძარი და მისი კელიის ასლია აშენებული. იგი სწორედ აქ მოღვაწეობდა და აღესრულა. მონასტერი დღემდე მომლოცველთა სიმრავლით გამოირჩევა. პლატოდან ქალაქისა და პარკის უმშვენიერესი ხედი იშლება.

ბორჯომიდან 7 კილომეტრში მდებარეობს სათხილამურო კურორტი ბაკურიანი. ზამთარში ბაკურიანში ჩასულ სტუმრებს შეუძლიათ ზამთრის სპორტის სხვადასხვა სახეობებითა და ატრაქციონებით დაკავდნენ, გაზაფხულსა და ზაფხულში კი ეკოლოგიურად სუფთა გარემოში დაისვენონ.

ბალნეოლოგიური და კლიმატური კურორტი

ბორჯომის ბუნებრივი რესურსები, მინერალური და გოგირდოვანი წყაროები, მარადმწვანე წიწვოვანი ტყეები და ჰავა ქალაქის სამკურნალო ფაქტორებია.

ბორჯომის მთავარი სიმდიდრე ვულკანური წარმოშობის, თერმულ-მინერალური წყლებია. ბორჯომის წყალი გამოიყენება სხვადასხვა სამედიცინო დანიშნულებისა თუ სპეციალური გამაჯანსაღებელი პროცედურებისათვის. ისტორიული პარკის ტერიტორიაზე და მის შემოგარენში მოწყობილია სპეციალური წყაროები, საიდანაც წყალი ბუნებრივი გაზის, ნახშირბადის დიოქსიდის წნევის მეშვეობით ზედაპირზე თბილი სახით ამოდის.

პარკში გახსნილია გოგირდოვანი წყლის აუზები, რომელსაც სამკურნალოდ ან უბრალოდ განსატვირთად და დასასვენებლად სტუმრობენ. წყლის ტემპერატურა 38 გრადუსამდე აღწევს, ამიტომ მასში ბანაობა ზამთარშიც შეიძლება.

გვიან გაზაფხულზე ბორჯომში სტუმრობა საუკეთესოა იმუნიტეტის აღსადგენად. მაისის პირველ ნახევარში ფიჭვისა და ნაძვის ყვავილობა და დამტვერვა იწყება და მის ბოლომდე გრძელდება. წიწვოვანი ხეების ყვითელი მტვერი მთელი ქალაქის თავზე ვრცელდება. მტვერი სასარგებლოა გულ-სისხლძარღვთა და რესპირატორული სისტემებისათვის.